Kultuur

LIGGIES MUSIEKSENTRUM

Die Liggies-musiekgebou is die hartklop van die skool waar musiekleerlinge hulle passie en drome uitleef. Ons spog met ons eie musiekakademie.
Die missie van die musiekakademie is om gehalte musiek toegangklik te maak vir almal en ‘n liefde vir musiek te kweek by die leerlinge wat hulle die res van hulle lewe sal bybly.

Liggies-musiek funksioneer op twee bene:
• Buite-kurrikulêre akademie waar enige iemand ʼn instrument kan leer speel.
• Musiek as keusevak.

Ons bied aan:
• Musiek as keusevak Gr 8 en 9
• Musiek as keusevak Gr 10 – 12
• Musiek as agste vak Gr 10 -12
• Musiek-akademie wat na skool funksioneer en leerlinge die geleentheid gee om instrumente te leer speel.

 

REDENAARS

Elke jaar vind daar ‘n interne kompetisie plaas om graadwenners te bepaal. Leerders kan deelneem aan ‘n Afrikaanse sowel as Engelse kompetisie.
Ons leerders presteer besonder goed by die ATKV Redenaars Kompetisie op provinsiale vlak sowel as nasionaal vlak.
Ook by Radikale Redenaars maak leerders van Hoërskool Lichtenburg hul stemme dik. Oor die afgelope drie jaar het ons verskeie nasionale wenners op gelewer.

 

 

AIA FEES

 

Die AIA fees – of te wel die Alles-in-alles fees is die hoogtepunt op die Liggies Kalender.
Elke jaar in Augustusmaand word daar vir ‘n hele week lank, kultuurfees by Hoërskool Lichtenburg gevier.
Daar is ‘n aand vir Klassieke Musiek, ‘n aand vir Liggies-het-talent, ‘n aand vir Toneel en ‘n aand vir ons gewilde Sêr Kompetisie. ‘n Fotografie Kompetisie, wat baie gewild is onder die leerlinge, maak deel uit van feesviering, asook ‘n kunsuitstalling. Leerders het selfs geleentheid om hul braaivaardighede te vertoon met ‘n gesellige Hoenderbraai Kompetisie. Finaliste vir elke geleentheid word aangewys, en die wenners van elke kategorie word bekend gemaak tydens ‘n gala aand.

 

HARTKLOP

Kom vind jou plek in God se hart….
Elke Woensdagaand vind daar ‘n Harklop samekoms plaas waar leerders die geleentheid kry om op geestelike vlak met mekaar te kuier. Plaaselike leraars is betrokke en verskeie jeugbedienaars maak deel uit van hierdie besonderse aksie.

 

ASTRANT KOERANT

Vir jare lank is die skoolkoerant een van die beste skoolkoerante in die land, en spog die Astrant met vele nasionale toekennings deur die jare. Die redaksie bestaan uit leerders en joernaliste werk saam om elke kwartaal ‘n pragstuk saam te stel.

 

 

HART-EN-HANDE

Die groep leerders van Hoërskool Lichtenburg is die hart van Liggies.
Daar word uitgereik in die gemeenskap, en duisende lewens word jaarliks deur hierdie omgee-groep geraak.
Projekte vir fondsinsamelings om mense in nood by te staan word geloots, en omgee vir ander word op baie verskillende maniere met oorgawe deur hierdie Liggies gedoen.